सुर्खेत । जिल्लामा भएका फरक फरक दुर्घटनामा एक जनाको मृत्यु र ११ जना घाइते भएका छन् । वीरेन्द्रनगरमा भएको स्कुल बस दुर्घटनामा ११ जना विद्यार्थी घाइते र लेकवेशीमा भएको अटो दुर्घटनामा चालकको मृत्यु भएको हो ।
वीरेन्द्रनगरको ईत्राम खोलामा डिभि निकेतनको बस चिप्लिएर खस्दा ११ जना विद्यार्थी घाइते भएका छन् । बुधबार साँझ वीरेन्द्रनगर नगरपालिका ८ इत्राम खोलामा ३२ जना विद्यार्थी बोकेर हिँडेको डिभि निकेतनको बस खोला तर्ने क्रममा चिप्लिएर दुर्घटनामा परेको हो ।
बसमा सवार ११ जना विद्यार्थी घाइते भएको छन् । जिल्ला प्रहरी कार्यालय सुर्खेतका प्रमुख रूपेश खड्काका अनुसार घाइते मध्ये एक अवस्था गम्भीर रहेको बताए ।
बस स्कुल बिदा भए विद्यार्थीलाई घर छाड्न जाँदै गरेको अवस्थामा दुर्घटनामा परेको हो । घाइतेहरुको उद्दार गरी स्थानीय देउती अस्पतालमा पठाइएको छ ।
यस्तै, मदन भण्डारी राजमार्गको गुम धुलियाविट सडक खण्डको लेकवेशी नगरपालिका ३, काप्रीखोला नजिक ट्रकले अटो रिक्सालाई ठक्कर दिदा चालकको मृत्यु भएको छ ।
दशरथपुरदेखि वडा नम्वर १ लेखफर्सातर्फ जाँदै गरेको मदेश प्रदेश ०३००१ क २४९१ नम्वरको ट्रकले विपरित दिशाबाट आईरहेको भे १ ह ६६७५ नम्वरको अटो रिक्सालाई ठक्कर दिएको थियो ।
ट्रकको ठक्करबाट अटो चालक ४८ बर्षका डिलबहादुर डडालीको घटना स्थलमै मृत्यु भएको जिल्ला प्रहरी कार्यालय सुर्खेतले जनाएको छ । घटनास्थलमा ट्रक र ट्रक चालकलाई नियन्त्रणमा लिएर आवश्यक अनुसन्धान भइरहेको प्रहरीले जनाएको छ ।
आवाजपत्र । २३ श्रावण २०८१, बुधबार १८:५६